be

నీ అరచేతుల నిండా వెల్లుల్లి వాసన
నా ముఖాన్ని ఇక
ఆ చేతులతో నిమిరినప్పుడు,

వొలిచిన రెమ్మలేమో ఇకా ఉదయపు
పల్చటి ఎండలో
నేలపై మెరుస్తో:మరి పొట్టేమో,

రాలిన ఆకుల వలే గాలికి ఊయల
ఊగుతో;  చూడు,
ఋతువు మారుతోంది. మరొక

వేసవి కొమ్మల్లోంచీ, కుళాయిపై ఆగి
అరిచే కాకీలోంచీ,
కొత్త కుండలోంచీ, చల్లని

నీళ్ళై, నీ చేతులలోంచి జీవధాతువై
మరో వేసవికై, ఇట్లా
వొలిచిన వెల్లుల్లి రెమ్మలై,

నీ అరచేతుల్లో ఒదిగే నేనూ, ఇంకా
కూర్చుని నిన్నే
గమనించే పిల్లల ముఖాలై!
***
నీ అరచేతుల నిండా ఒక సువాసన
జీవన శ్వాసై మరి
పరిపక్వమైన ఒక మెలకువైతే,

నీతో ఉండటం ఎంత బావుంది!