- పాషాణం -

- "ఏం ఉంది నీ వద్ద?" అని అడుగుతుంది తను -

ఆహ్: చీకటిని గులాబీలా చుట్టి, వెన్నెల వాసనతో

వాన చినుకులతో

నింపి,ఈ రాత్రంతా

- నీ చుట్టూ సీతాకోకచిలుకల వలే ఎగిరే -

ఆహ్, కథలై కలలై 

ఇద్దరినీ హత్తుకునే 

కడలై చల్లని నీడై 

నీతో కలసి ఉండగలిగే రహస్యం ఒకటి ఉంది నా వద్ద: 

మరి, కావాలా నీకు అది? 

అని వినమ్రంగా అడిగాడు 

అతను తల ఎత్తి -

గాలికే కదిలే కాగితాలపై ఒక గాజురాయిని ఉంచి

తల తిప్పుకుని,వంచుకుని 

వెళ్లిపోయింది ఆ అమ్మాయి-

ఇక, గాజునయనాలతో ఆ గదీ, కన్నుల్లేని క్షమ లేని  

కాగితాలతో అతనూ  

ఏం మాట్లాడగలరు 

అర్థాంతరంగా/ అస్థిమితంగా/ మిగిలిపోయిన/ ఆ రాతి 

రాత్రి అంతా-? అంతటా?