- ఒక అద్దం -

కనుపాపల కింద చీకటి మొనతో గీస్తున్నట్టు ఒక కోత -
     హృదయానికీ దీనికీ సంబంధం లేదు -
     ఇది నిజంగా

కళ్ళకీ, చూపుకీ సంబంధించినదే. ఇది నీకూ, నాకూ
    సంబంధించినదే . నాకూ నాకూ మధ్య
     ఒక జలపాతం కింద
     పదునైన క/నీళ్ళపై

- పాకుడు రాళ్ళపై నడక ఇది - ఎలుగెత్తిన శబ్ధం ఇది -

ఆక్కడే, ఇక్కడే, నాకు

- ఇరువైపులా పొంచి ఉన్న నీ ముఖం -
- ఇరువైపులా పొంచి ఉన్న నీ చేతులు -
- ఇరువైపులా పొంచి ఉన్న నీ పదాలు -

ఎటు జారినా, మృత్యోధ్యానవనంలో, పుష్పించే గులాబీ

- అద్దం పెంకులు. నెత్తురు పరిమళాలు. మణికట్టుపై
     తార్లాటలాడే సన్నటి నీడలు -
     అవే - వానలో నిలువ లేని
    నిలువ నీడ లేని నీడలు-

ఇక ఏం చెప్పగలడు అతను - ఒక అద్దంలో ముఖం
    కూరుకుపోయి, నీ చేతిలోంచి
    జారి పడిపోయి,ఎక్కడా పూర్తిగా

తనని తాను కనుగొనలేని అతను -? చూడు - ఇక

ఒక అద్దం
తన ప్రతిబింబం ముందు మోకరిల్లి, అవనతమయ్యి
కంపించిపోతూ

ఎలా
తనకై తాను అర్ధిస్తో
తపించి/పోతుందో! -