ఇవాళ

అరచేతులలో
విచ్చుకున్న రోజా పూవు కాదు ఈ దినం

నీడలలోనే, విచ్చుకున్న
మెత్తటి పూల నీడలలోనే, నీడల నీలాల కనులలోనే

దేవతా రూపం ఒకటి
మృగ మోహంలా మారింది
ఒక దినం రాలిపోయింది.

ఇక
ఒక విత్తనంలోకి ఇంకిన
నిన్నటి చినుకులోని నిశ్శబ్ధాన్ని వినేదెవరు?
రాత్రి వీచిన గాలికి వొణికి
ఉదయమంతా రెపరెపలాడిన చిగురాకును

మృదువుగా కాంచేదెవరు? ప్రభూ     

ఈ  అరచేతులలోంచి
రేపటి సమాధులకై జాలువారిన
ఆ దినపు రోజా పూలను

చూసావా నువ్వు ఇంతకూ?