స్మశానాలు

మట్టి గంధం పూసుకున్న
మెత్తటి గాలి కావాలి

మట్టి కుండలోని
బావిలోని చల్లటి మంచి నీళ్ళు కావాలి

కూర్చునేందుకు
హిమవనాల వేపాకుల నీడ కావాలి

ఇంకొంత కాలం
కొనసాగేందుకు ఇక్కడో మిత్రుడుండాలి

ఇంటికొస్తే

ఇంత తేలికపడేందుకు
కొంత బ్రతికి ఉండేందుకు

ఒక నవ్వు ముఖం కావాలి
ఒక మాట కావాలి_

అటువంటి
ఇంద్రజాల ప్రదేశమేదైనా తెలుసా నీకు

స్మశానాలు లేని ఇళ్ళూ
సమాదులుగా మారని

మహా మర నగరాలూ?