నీడలు

మబ్బు పట్టి ఉంది అప్పుడు.

'ఎవరూ లేరు నాకు' అని తనే అనుకుందో లేక నువ్వే అనుకున్నావో
లేక, చివరికీ గాలే అనుకుందో కానీ
ఆకుల అలలపై సాగేఈ కాలం నావ

నెమ్మదిగా ఆగిపోతుంది. ఒక సముద్రం నిశ్చలమవుతుంది. ఇక
ఒక పిట్ట కొమ్మల్లోకి ముడుచుకుపోగా
ఒక పసి పసిడి శరీరంతో ఆ రాత్రి

పగలే కన్నీరు పెడుతుంది. నీ ఛాతి అంతా
కుంకుమమయం అవుతుంది
వాన పడుతుంది. గుండె చెదిరి
నీ గూడు చెదిరి, నీ మనస్సంతా

చిత్తడి చిత్తడి అవుతుంది. నీళ్ళు గుమికూడి

అలజడి సవ్వళ్ళుగా, వలయాలు వలయాలుగా మారే
ఒక, చిన్ని నీటిగుంట అవుతుంది.
ఇకప్పుడు - మబ్బు పట్టినప్పుడు
మబ్బుపట్టి నువ్వు కురిసేటప్పుడు

ఒక పసిడి పావురం, తన పాదాలతో నీ ఛాతిని
నెత్తురోడేలా గీరుతూ, నీపై తచ్చాట్లాడుతూ
"ఎక్కడికి పోయావు నువ్వు? ఇన్నాళ్ళూ?

నాతో కనీసం ఒక్క మాటైనా చెప్పకుండా?"

అని వెక్కిళ్ళతో జీరగా, ఉబ్బసం గొంతుతో అడిగితే

అప్పుడు

మబ్బు పట్టి - మబ్బు పట్టి
మబ్బు పట్టి - మబ్బు పట్టి
మబ్బు పట్టి - మబ్బు పట్టి

ఇనుప సంకెళ్ళయి ఊగే

నల్లని నీడలు - తెల్లని నీడలు

ఎవరికీ చెప్పుకోలేని, కన్నీళ్ళు పెట్టుకోలేని
పొదలవంటి మాటలవంటి
నీలాంటి

నీడలు - నీడలు
నీడలు - నీడలు
నీడలు - నీడలు
నీడలు - నీడలు
నీడలు - నీడలు

నీ...