ఆట

ఏదో చెప్పాలని అనుకుంటావు
ఇంతకుముందు ఎవరూ చెప్పనిదీ, ఎవరూ సూచించనది కూడా-

అప్పుడు, గోడలపై నీడలు
అగ్నికీలల వలే రెపరెపలాడుతూ ఎగబాగుతూ  ఉంటాయి
లేత ఎండలో తూనీగలు సీతాకోకచిలుకలతో ఎగురుతూ ఉంటాయి.
ఇక పిల్లలే, పొలోమని అరుస్తో వాటి వెంబట.
ఇక ఒక కుక్కపిల్లే తోకూపుకుంటో

వాళ్ళ వెంటా, తెల్లటి మబ్బులా సాగే
గాలి వెంటా, గాలిలా కొట్టుకుపోయే మబ్బుల వెంటా
పూలల్లా రాలే చినుకుల వెంటా, గునగునా పరిగెత్తుకుపోయే ఆకుల వెంటా
రేగే ధూళి వెంటా, పొదలలోంచి తప్పించుకుని సరసారా పాకిపోయే

ఒక పచ్చని పచ్చి వాసన వెంటా
కొంగు కప్పి తన లోకాన్ని తడవకుండా కాపాడుకుంటున్న
ఒక తల్లి వెంటా, తన పాదాల వెంటా, బయట లోకమంతా వాన కురస్తా ఉంటే
లోపల మబ్బులు పట్టి కూర్చున్న నీ వెంటా

సరిగ్గా అప్పుడే  
ఇంతకుముందు ఎవరూ చెప్పనిదీ, ఎవరూ సూచించనది కూడా
నువ్వు చెప్పాలని కూర్చున్నప్పుడే

ఎవరి వెనుక ఎవరో
ఎవరి పదాల వెనుక మరెవరో అని తెలియక నువ్వు
సతమతమౌతున్నప్పుడే, ఇదొక ఆట అని మరచి  
నువ్వు గంభీర మౌతున్నప్పుడే 

మరి, సరిగ్గా అప్పుడే, సరిగ్గా అక్కడే-!