ఈ సమయం

ఈ లోకంలో ఎదురుపడే ప్రతి ముఖపు సమాధి ముందు వేన వేల మంది
పుష్ప గుచ్చాలతో
మోకరిల్లి ఉంటారు

ఏమీ లేని సమయపు ఖడ్గం కింద మెడను వాల్చినందుకు పిల్లలే నిన్ను
మరికొంతకాలం గుర్తుపెట్టుకుంటారు. ప్రమిదె వెలుతురులో దాగిన
చీకటిలో కనుమరుగైన స్త్రీలే నిన్ను మరికొంత కాలం జ్ఞాపకం ఉంచుకుంటారు.

ఈ ముఖం వాళ్ళ మధ్య నుంచే వచ్చింది. ఈ మట్టిలోంచీ, సముద్రాల్ని చుట్టి వచ్చిన గాలిలోంచీ
నిప్పులోంచీ శరీరంలో యుగాల స్పృహతో కదులాడుతున్న నీటిలోంచీ
నింగిలోంచీ, ఈ ముఖం వీటన్నిటి నుంచే వచ్చింది. సర్వత్రా కదులాడే
మనుషుల అరచేతుల మధ్యే
ఈ ముఖం రూపు దిద్దుకుంది.

ఓరిమిగా దినాలను గడుపుతూ నీ ముఖాన్ని రూపుదిద్దుతారు వాళ్ళు. వర్షాలతో నిండుగా
కదులాడే నదులలో నీ ముఖాన్ని శుబ్రం చేస్తారు వాళ్ళు.
ఆత్మలూ దేవతలూ మృగాలూ వాళ్ళు. సమాధులలోంచి
ఏరుకు వచ్చిన అమృతపు ధూళితో
నీకు చూపును ఇస్తారు వాళ్ళు. ఈ

లోకంలోకి నీ ముఖాన్ని తీసుకువచ్చిన హస్తాలే, లోతైన భూమి పొరలలో
బ్రతికి ఉన్న కనులతో ఎదురుచూసే నీ పూర్వీకుల వద్దకు
తీసుకు వెడతాయి. మరికొంత సేపు అలా వేచి చూడు -
ఏమీలేని సమయపు ఖడ్గం కింద మెడను వాల్చినందుకు

ఈ లోకంలో ఎదురుపడే ప్రతి ముఖపు సమాధి ముందు
వేనవేల మంది నిశ్శబ్ధపు ప్రార్థనలతో మోకరిల్లి ఉంటారు.