silly, but still...

నిన్నొకసారి తాకాలని ఉంది - కానీ నువ్వెవరో నాకు తెలియదు.

ఎండిన ఊదా సాయంత్రాల చుట్టూ చుట్టిన
ఒక తడి గుడ్డగా నిన్ను ఊహిస్తాను-

రహదారుల పక్కగా ఉంచిన ఒక కుండ ఈ శరీరం అని
నీకు ఎలాగూ తెలుసు. ముంచుకునీ
ముంచుకునీ తాగి వెళ్ళిపోయేవాళ్లకు

వాళ్ళ గొంతులను చల్లబరచేదీ, వాళ్ళ
శ్వాసలను క్షణకాలం ఓ చల్లటి గాలిగా
మార్చేదీ, నువ్వేనని తెలియదు. మరి
సాయంత్రం తిరిగి వచ్చిన పక్షులు రెక్కలు ఆర్పుకుంటూ, విదుల్చుకుంటూ, మాన్పుకుంటూ

- ఇక్కడ -

ఒరిగిన గడ్డీ, వడలిన పాదాలూ నలిగి
ఉండ చుట్టబడిన కాగితాలైన కనులూ
శిలలైన మనుషులూ, మనుషులైన శిలలూ, ఎదురుచూసే స్త్రీలూ, అనాధ గృహాలూ, ఇళ్ళూ

- ఇక్కడ-

ఒకరిని మరొకరు తాకలేని
మహా రాక్షస సమయ రాహిత్యమూ, మాట లేని మహా నిర్మానుష్య మౌనమూ, అంతులేని
ప్రసారాలలో కూరుకుపోయి

పునరుత్పత్తి సాధనాలుగా మాత్రమే మిగిలిన
నువ్వూ నేనూ అయిన
డైలీ సీరియలైజ్డ్ కథలూ

 - ఇక్కడ-

ఇక్కడ

O One
O blue blue One
O blue blue One
Of the None

నిన్నొకసారి తాకాలని ఉంది. నీ చేత ఒకసారి తాకబడాలనీ ఉంది

- ఇక్కడ-

మరి ఈ లోపల ఎవరైనా నన్ను, ఇంత తవ్వి
అందులో నిన్ను నాటి పోతే
ఎంత బావుండు - (!)