చినుకులు లేని రాత్రిలో

1
ఏకాకిగా వెలిగే ఒక దీపం -

గాలికి తల్లడిల్లుతూ కూడా
నింగికి ఎగబాకుదామనుకునే
ఒక నిప్పు సెగ -

నిప్పుకీ, నీరు ఒక ఉపశమనం
అని తెలియక

ఇంకా రాని
మబ్బులు-
2
నీడలు. నీడల్లోంచి నీడల్లోకి
తేలిపోయే కనులు-

అతను తన వైపు చూసినప్పుడు
అక్కడొక
బావురుమనే ఆకాశం-

ఎండకి వడలిపోయి
నిస్త్రాణగా తలలు వాల్చిన
పూవులు

ఆ కనుపాపలు-
3
జల్లిన గింజల చుట్టూ వాలిన
పావురాళ్ళు
దిగ్గున

నింగికి ఎగురుతాయి-

ఏమీ లేక, ఎవరూ దొరకక

చేతులు రెండూ
రెండు రెక్కలైతే
నింగికి ఎగురుదామనుకునే
ఒక మనిషి -

అతనో, తనో
నువ్వో, మరెవరో-
4
కుండలో
కుదుటపడ్డ నీళ్ళల్లో, మళ్ళా
ఒక చిన్న కదలిక -

పెదాలపై
నెలవంక వంటి నీటి ధార
ముఖంపై
లేత వేళ్ళేవో లతల వలే అల్లుకున్నట్టు -
5
ఉగ్గబట్టుకున్న
మబ్బులూ, గాలీ, ఆకులూ, పిల్లలూ
అన్నీ, అందరూ

బిగించి పట్టుకున్న
నీ గుప్పిట్లలోనే -
6
గాలికి తల్లడిల్లుతూ కూడా, నింగిలోకి
తపనగా ఎగబాకే
ఒక నిప్పు సెగపై

రాలిన ఒక చినుకు. సోకిన
ఒక అశ్రు శ్వాస
ఒక పదం-
7
రా.

ఉండు.
నేను మళ్ళా నిన్ను రాయగలను
ఈ

చినుకులు లేని రాత్రిలో
రాతి ఛాతిలో
నీలో
నాలో

నిన్నూ
నన్నూ-

Amen.