aint no poem

నువ్వోసారి తలుపులు, నీ తలుపులు తెరవగలిగితే 

పసి వాసనతో ఒక గాలి లోపలికి రావొచ్చు
లతను వొదిలి ఒక పూవు నీ పైకి వొంగి నిన్ను తాకవచ్చు
          రాత్రి చెమ్మని నీపై చిమ్మవచ్చు -

నువ్వోసారి తలుపులు, ఆ తలుపులు తెరవగలిగితే 

సన్నటి నవ్వుతో ఎవరో నిన్ను పలుకరించవచ్చు
     కన్నీళ్ళతో ఎవరో నిను చుట్టుకోవచ్చు 
     వండిన - తమకో, నీకో- అన్నాన్ని 
     నీకు ఒక ప్రార్ధన వలే ఇవ్వవొచ్చు -

నువ్వోసారి తలుపులు, నీ తలుపులు తెరవగలిగితే 

నీకొక ముఖం ఎదురు రావొచ్చు 
నీకు చెప్పాలనుకుని అప్పటిదాకా వల్లెవేసుకున్నవన్నీ 
     లోపలే నొక్కిపెట్టి, లోపలికి వెళ్ళిపోనూ వచ్చు - 
     పడక ఒక ఊబై, దిండు ఒక అంతిమ కౌగిలై
 అలా మిగిలి పోనూ వచ్చు - 

నువ్వోసారి తలుపులు, ఆ తలుపులు తెరవగలిగితే 

అక్కడొక వీధి కుక్క, గాట్లతో నిలబడి ఉండవచ్చు 
     ఎండుకుపోయిన దాని డొక్కలో, తల్లులూ తండ్రులూ 
     పిల్లలూ పాపాలూ ఏడుస్తుండవచ్చు - నిండు 
గర్భంతో ఒక మనిషి సర్వం తెగి 
విలపిస్తూ ఉండి ఉండవచ్చు -

నువ్వోసారి తలుపులు,మన తలుపులు తెరవగలిగితే, చాలాసార్లు 

అక్కడ ఏమీ ఉండకపోవచ్చు - ఎదురుచూసీ చూసీ 
     తల్లిపాలతో నిండిన వక్షోజాలు రెండు, గుమ్మానికి మోకరిల్లి, నెత్తురుతో 
     చిప్పిల్లతుండవచ్చు - నువ్వే అయ్యి 
     కరుగుతుండావచ్చు - ఆఖరి శ్వాసకై 
     తపిస్తూ ఉండవచ్చు: రోజూలాగే 

చనిపోతుండా వచ్చు, శూన్యం అయ్యి ఉండావచ్చు 
ఏమైనా కావచ్చు, కాకపోనూ వొచ్చు - 

ఒక్కసారి నువ్వు ఆ తలుపులు కాగలిగితే 
ఒక్కసారి నువ్వు ఆ తలుపులై 
తెరవబడగలిగితే -!