ఒక చిన్న విన్నపం

- ఒక లలితమైన నిశ్శబ్ధం, లోపల -

కొత్తగా కట్టుకున్న గూటిలోకి పక్షులు చేరి ముడుచుకున్నట్టు
మబ్బులు కమ్మి, చల్లటి గాలి వీయగా
పూవులు రాలే దారుల్లో
నువ్వు తల వంచుకుని

నడుస్తున్నట్టు: నీ పక్కన ఎవరూ లేకపోయినా, ఎవరి ఊహో
ఆకస్మికంగా నీ పెదాల పైకి ఒక
చిరునవ్వుని తీసుకువచ్చినట్టూ-

- అవును నాకు తెలుసు - ఇదంతా రూపకాలపై రూపకాల
భాష అనీ, అంతకు మించి నాకు
ఇక్కడ మరేమీ లేదనీ, రాదనీ -

కానీ ఏం చేద్దును, పసి నిదుర వంటి ఒక  నిశ్శబ్ధం
లోపల, ఒక పక్కగా ఒత్తిగిల్లి
వెచ్చగా నాలోకి చేరినప్పుడు?

- ఏమీ చేయవొద్దు, ఏమీ మాట్లాడవద్దు -

నువ్వూ కూడా అకారణంగా నీలో నువ్వు, నీతో నువ్వు
నవ్వుకుంటూ కూర్చో ఇలా
ఒక మధుపాత్రతో, చీకటలో

ఒక ప్రార్ధనతో, ఈ ఆకాశంతో

నుదిటి మధ్యన నెమ్మదిగా విస్తరిస్తున్న
సరస్సులోని వెన్నెలతో
సడి చేయనని అలలతో-