- ఒక చిన్న దారి -

1
మళ్ళా చీకటి గురించే-
మన చుట్టూ, మగ్గిన ఫలం వంటి వాసనతో 
వ్యాపించే చీకటిలోంచే-
2
పసిపిల్లలు చేతివేళ్ళ చివర్లలాంటి చినుకులూ 
ఎవరో ఓదార్పుగా నీ నుదురుని నిమిరినట్టూ 
కొంత గాలి
ఈ రాత్రిలో-
౩
మసకగా వెన్నెల- 
నీడలేవో కదులుతాయి అప్పుడు.  
మరవి నీ లోపలో,బయటో తెలియదు 

నీకూ తనకూ 
ఎన్నటికీ-
4
నేను ఎన్నడూ చెప్పలేదు ఎవరికీ 
ప్రేమించడం తెలికైనదనీ 
బ్రతకడం ఆనందమనీ-
5
మళ్ళా చీకటిలోని కాంతి గురించే ఇదంతా- 
6
ఇదిగో ఇది విను 
నీకు ఇంతకు మునుపు చెప్పనిది-

రహదారిపై పిల్లలు 
గులకరాళ్ళు ఏరుకున్నట్టు
పలుమార్లు ఇక్కడ  
మనల్ని మనం ఏరుకోవాలనీ,దాచుకోవాలనీ 

అప్పుడప్పుడూ తెరచి చూసుకోవాలనీ- 
7
ఎందుకంటే,ఊరికే అలా 
చచ్చిపోలేం కదా మనం
నిద్రమాత్రలతో లేదా,మన అనంత నిశ్శబ్దాలతో-  

అందుకని... 
8
దా-

ఈ అరచేతుల మధ్యకు 
నీ అరచేతినీ,అరచేయి వంటి నీ ముఖాన్నీ వొదిలివేయి-
9
ఆనక ఉందాం మనం
నువ్వూ నేనూ 

ఏమీ చేయక 
మన చుట్టూ మొలకెత్తే 
రేపటి కాంతిలో,మరికొంత శాంతిలో

నాలో, నీలో- 
.
.
.
.
.
.
.
Amen.