ఎగిరొచ్చి...

ఎక్కడి నుంచో ఎగిరొచ్చి వాలిందో బంగారు పిచ్చిక
బిత్తర చూపులతో -

పాపం, ఎందుకొచ్చిందో ఎవరికి తెలుసు? గూడు
కట్టుకుందామనుకుందో, గింజలు
ఏరుకుందామనుకుందో, మరి

మట్టి ముంతలోని నీళ్ళ కోసమో, పుల్లల కోసమో
నీ కోసమో, ఎందుకొచ్చిందో లోపలికి
తత్తరుపాటుతో, కిచకిచమంటో

ఎక్కడి నుంచో ఎగిరొచ్చి వాలింది, వాలు చూపుల
బంగారు పిచ్చిక -

వాలి, ఎంతో భద్రంగా ఆకుల మాటున దాచుకున్న
నీ హృదయాన్ని నోట కరుచుకుని

కిలకిలా నవ్వుతూ వెళ్ళిపోయింది, అల్లరి కనుల
తుంటరి రాకాసి పిల్ల !