మననం

నీకు తెలియకుండానే, నీ ప్రమేయం లేకుండానే, మరి
***
చేజారి, ఒక దీపం పగలిపోయి ఉండవచ్చు. ఎవరిదో ఒక
హృదయం ఆరిపోయి ఉండవచ్చు -
వాన చినుకై ఒక ముఖం, రాత్రిలోకి అశ్రువై, రాలిపోయీ
ఉండవచ్చు. చివరికి బాహువులు

అనాధాలై, నీకు ఏమీ విప్పి చెప్పుకోలేక, తమలోకి తామే
బెంగతో ముడుచుకుపోయి ఉండవచ్చు
దిక్కు తోచక విలవిలలాడీ ఉండవచ్చు -
***
చూడూ, మరి అందుకే, కొన్నిసార్లు
ఊరికే వాళ్ళకై అట్లా ఉండు: కనులపైని నీటిపొరలాంటి
దయతో, ఇంకొంచెం ఓరిమితో-!