కృతజ్ఞత

నీ శరీరం అప్పుడు చక్కగా గోధుమల వాసన వేసేది
నీళ్ళు ఒంపిన పొలంలా -
***
నీ ఎదురుగా నేను: మంత్రముగ్ధుడనై, వెలిగించిన
దీపపు వెలుతురులో ఊగే నీడల చివర్లని
వేళ్ళతో తాకుతూ, నవ్వుతూ -

ఎందుకు నవ్వానో, ఏం మాట్లాడానో నీతో ఆ రాత్రి -
బయట మాత్రం, గాలీ వానా రాలే చినుకుల
సవ్వడి, నీలోపల ఒదిగినప్పుడు -

చితుకుల మంటలా నీ పెదాలు. ఒక తోట నీలో -
పూలని ముద్దాడాను. సీతాకోకల రెక్కలని
విన్నాను. రహస్యమై పోయాను

నిన్ను తొలిసారిగా కనుగొన్నట్టు, ఒక ఇంద్రజాల
లిపిని చదివినట్టు, నీ వక్షోజాల ఛాయలో
శిశువునై, నిద్రలోకి జారిపోతే
***
నీ శరీరం అప్పుడు ఆలయంలోని ఒక దీపమై
ధూపమై, గంటై
వెలిగింది, పరిమళించింది, ధ్వనించింది - అందుకే
***
మరి వినపడుతుందా నీకు, వెదురు వనాల్లోంచి
వెన్నెల లేక, అట్లా ప్రతిధ్వనించి
స్థాణువై మిగిలిపోయే

ఒక ఖాళీ గాలీ, ఈ రాత్రీ, ఓ ఒంటరి పాటా?