ఇక్కడ

కిటికీలు తెరిచాను. నాలుగు చినుకులు రాలిన
గుర్తులు, తడితడిగా -
***
నీ లాంటి గాలి. హృదయంలో ఒక చిన్న అలజడి -
లోపలి సరస్సులో తిరుగుతున్నారు
ఎవరో, బంగారు చేపపిల్లై -

నవ్వకు. చీకటి చిన్నబుచ్చుకుంటుంది. ఈ దీపం
రెపరెపలాడుతుంది, పూలల్లోని
రాత్రి మంచు వొణికిపోతోంది -

నిస్సహాయుడని. నీ చేతుల్లోంచి చేజారిపోయిన
బాలుడిని. కోపగించుకోకు, ఎదగలేదని:
అలగకు, నీ మాట వినలేదనీ -
***
తలుపులు తెరిచాను. నాలుగు చినుకులు రాలిన
గుర్తులు, నీ అశృవుల్లా -
***
అమ్మాయీ, ఎవరో ఎక్కడో ఎందుకో రోదిస్తున్నారు -
నువ్వు కానీ చూసావా
తెగిన వాళ్ళ కళ్ళని?