విజ్ఞప్తి

చక్కటి పూవువి నీవు-

ఎండలో, వేపచెట్టు కింద చల్లగా కదిలే నీడల్లానూ, తేలే గాలిలానూ సెలయేరులానూ
ఉంటుంది మరి నీ ముఖం.

చీకట్లో దీపం వెలిగించినట్టు
ఆ వెలుతురులో నీ గదిలో

కూర్చుని నీ అరచేతులని పుచ్చుకుని వాటిలో కాలాన్ని చూసుకున్నట్టూ, మరి
ఆ అరచేతుల్లోనే చిన్నగా
ఒక పిట్టై వాలిపోయినట్టూ

ఉంటుంది లోకం అప్పుడు-
చూడు:మరి నీ ముఖంలోకి

అతి నెమ్మదిగా నా చేతులు ముంచుకుని, ఆ కాంతి జలాన్ని మృదువుగా అందుకుని
మలినమైన నా ముఖాన్నీ
చేతులనీ పదాలనీ చక్కగా

కడుక్కుని కూర్చున్నాను
ఈ గుమ్మం పక్కగా, గోడకి
అనుకుని గోడలపై నీడలతో-

ఇంత అన్నం పెడతావా ఇక?