అప్పుడు, అక్కడ

అప్పుడు, అక్కడ, తల వంచుకుని కూర్చుని ఉంటుంది

నీ ముసలి తల్లి: ఆ చిన్ని వరండాలో, తన
జుత్తు విరబోసుకుని తల దువ్వుకుంటూ-

చెట్టుపైకి వొంగి, చెమ్మగిల్లిన నింగి.
రాలిపోతున్న పసుపు వేపాకులు.
పాలిపోయిన ఆ కాంతిలో,ఆ చెట్టు

బెరడుని గీకుతూ, గుర్రుమనే పిల్లులు. కంపించే నీడలు.
అక్కడక్కడా పిల్లలు వొదిలి వేసిన
పగిలిన బొమ్మలు.అద్దం పెంకులూ-

వెనుకగా పక్షి పిల్లలు లేని ఒక ఒంటరి గూడు. అక్కడక్కడా
కొమ్మల మధ్యలో ఊగే సాలె గూళ్ళు.
అలసిన తన, ఎండిన పెదాలను
కోసుకుని ఉబికే నెత్తుటి తడీనూ-

ఇక ఉన్నట్టుండి వీచిన చల్లని గాలికి, తను తల ఎత్తి చూస్తే
ఎప్పట్లా నిన్ను చూసి నవ్వితే
ఎదురుగా నువ్వు. అదే: దారి
తప్పో, దారి మరచో, ఇంటికి

వచ్చిన నువ్వు - ఇక అక్కడ

ఉండాలేకా, వెళ్లిపోనూ లేకా, మాట్లాడలేకా, ఏమీ కాలేక...