గ్రహింపు

రోజు బావుంది, అని నువ్వు అంటావు. అప్పుడు నీ ముఖంలో
సంతోషపు పూల కాంతి -

అవును, నేను అంటాను, ఈవేళ - స్కూలు బస్సులోంచి
ఒక తెల్లని రోజా పూవు, నేను ఎవరో
తెలిసినట్టు, నా వైపు చేయి ఊపుతో నవ్వింది: ఇంకా
ఎవరో రహస్యంగా ఒక పుష్పగుచ్చాన్ని

నీ బల్లపై ఉంచి, దాగుని చూస్తున్నట్టు
గడిచే ఈ కాలం కొంత కుతూహలంగా కూడా ఉంది.
అవును, నిజం:

రోజులు ఎంత బావుంటాయి, కాంతివంతమైన నీ కళ్ళల్లా
మనం ఏమీ ఆశించనప్పుడు!