బ్రతకడం

బ్రతకడం ఎలా, అతను అడిగాడు, దిగులుగా -

చెదిరిపోయిన గూడులా, ఇల్లు పీలికలుగా -
వస్తువులపై,  ఒకరికి ఒకరు ఒకప్పుడు ఇష్టంగా బహుమతిగా ఇచ్చుకున్న
పింగాణీ బొమ్మలపై

పుస్తకాలపై, గాజు పాత్రలపై, దుస్తులపై
అల్మారాలో - నవ్వే దినాల ముఖాల ఫోటోలపై, తెరవని కిటికీలపై పొరలా
పేరుకున్న దుమ్ము -

బ్రతకడం ఏలా, అతను మళ్ళా అడిగాడు, బహుశా
ఈసారి ఒకింత నిస్సహాయంగా -

ఇక
తను తెరచిన తలుపులలోంచి ప్రసరించే
ఆ శీతాకాలాంతపు సూర్యరశ్మిలో, దుమ్ముని తుడిచీ, దుస్తులనీ పాత్రల్నీ సర్దీ
ఎన్నాళ్ళుగానో

నీళ్ళు లేక వడలిపోయిన మొక్కలకి
నొచ్చుకున్న ముఖంతో ఇన్ని నీళ్ళు తాపిస్తూ, ఒరిగిన పూలని చిన్నగా తాకుతూ
తను ఏమీ మాట్లాడలేదు!