పాదం మోపలేను అక్కడ
నీ నయనాలు ఆగిన చోట
తిరిగేవీ తిరిగి రానివీ అవే
నువ్విచ్చిన పెదాలే
ఎక్కడా అని అడగకు.
హృదయంపై ముద్రితమైన
ఉమ్మి జాడను వెదకకు.
ఛాతిని హత్తుకున్న చేతులు
చూపులని చీకట్లలో
ముంచివేసిన కురులు
అవే పాదాలూ అవే పెదాలూ
విరిగిన గదులలో
కాలిన వెన్నెల దేహాలూ
ఎందుకూ అని అడగకు
ఎక్కడా, ఎప్పుడూ అని
చూడకు చూపించకు
వెళ్లిపోయిందీ నీవే. వెను
తిరిగిరానిదీ నీవే:
పాదం మోపలేను అక్కడ
నీ నయన శిలాజాలు
మిగిలిన చోట
= నీ చూపు కాంతి ప్రసరించిన
నీరెండ నీడలలో
వాన చినుకులలో
తుళ్ళుతున్నాయి
రెండు పిచ్చుకలు.
తెలుసా నీకు అవి ఎలా
తిరిగి రాని దూరాలలోకి
రాలిపోబోతున్నాయో?
No comments:
Post a Comment