అ/జ్ఞానం 27.

రాయలేవ్ నువ్వు

రెండు పాదాలతో
ఏడు లోకాలు తిరగాలి

చేప కన్నులో
చిక్కిన జాబిలిని తాకాలి

అలల వలలో
దాగిన వేసవిని మీటాలి

రానీ వాళ్ళను
వేటగాళ్ళను

రానీ వాళ్ళను

స్త్రీలను, స్మితవదనాలను కధనాలను
తధాగతుని వాచకంతో,పురాజన్మల
ప్రతీకారంతో కారుణ్యంతో=

ఏం చేయలేవ్
నువ్వు

కన్నుని వీడుట కన్నీటి ధర్మం
కన్నీటిని, చూపునీ పరిహసించుట
మిత్రుని ధర్మం

దరిచేరుట, దారిచూపుట
దయగా బాకుని డెందమునందు
దించుట, నీవు మోహించిన
పుష్పపు ధర్మం=

రాయలేవ్ నువ్వు, ఏం
చేయలేవ్ నువ్వు

రెండు నయనాలతో
సప్తలోకాలను తిరగాలి

తిరిగి రా, తిరిగి
తిరిగి రా

స్వసమాధిలోకి
విదేహంలోకి
నిర్యానంలోకి=