అ/జ్ఞానం 14.

నిదురపోయే ప్రయాణం కావాలి
ఇవ్వగలవా?

పిట్టలు అలసివిపోవు. ఆడీ ఆడీ
పిల్లలు సొలసిపోరు

ఇల్లంతా తిరుగాడుతూ, ఇంటిలో
కాంతిని నింపే ఆమె

కాంతిని వొదిలి, కారుణ్యం లేని
చీకటిని ఇష్టపడే అతడూ

మీకు తెలుసు. ఇంకా ఒకరికొకరు
అపరిచితులైన వాళ్ళకే తెలీదు

రాత్రైతే లిల్లీ పూవులు పూస్తాయి
వెన్నెలో లేక నవ్వే నక్షత్రాలో

నీపైకి దయగా రాలతాయి.

చూడు ప్రపంచం మొత్తం ఎంత
దయతో కదులాడుతుందో

పూలు అల్లుకుంటున్న
ఆమె కళ్ళలో ఎంత ఇష్టం
గుమికూడుకుంటుందో

సన్నగా రెపరెపలాడే పరదా వెనుక
ఎంత చల్లటి గాలి వీస్తుందో

నీకై ఎంత శాంతి అద్రుశ్య౦గా
రహస్యంగా దోబూచులాడుతుందో

మృత్యుదర్పణం వొదులు.
ఆ పేరులేని దిగులిని విడువు.

ఇస్తానంటోంది తను బహుమతిగా
మరుపులాంటి ప్రయాణం

వెళ్ళు. వెళ్లి కాసేపు నిదురపో.