నల్లటి పావురమొకటి
కువకువలాడుతోంది
హృదయంలో గూడు కట్టి
గుడ్లని పొదుగుతోంది
ఆగి ఆగి కదులుతోంది
ఆగి ఆగి ఎగురుతోంది
గరుకైన దాని గోళ్ళ గీతలు
నీ అరచేతిపైన
పదునుగా కదులాడే దాని
ముక్కు నీ కళ్ళపైన
ఆదుర్దా అంటే ఏమిటో
తెలిసిందా ఇప్పటికైనా?
పోగొట్టుకోవటం అంటే ఏమిటో
అర్థమైందా ఇన్నాళ్లకైనా?
పొదిగింది నిన్ను తనలో
పొదుపుకుంది నిన్ను
తన తనువులో
ఈదురు గాలి వీచిన వేళల్లో
వర్షం కురిసిన రాత్రుళ్ళలో
రెక్కలని పరిచి,తన శరీరంతో
నెగడును రగిల్చి,అన్నీ మరచి
రక్షించుకుంది తను నిన్ను
ఒక శిశువు వలె
తన రొమ్ములకి
చుట్టుకుంది నిన్ను:
కలవరపడింది
కంగారుపడింది. అంతిమంగా
గాయపడింది.
అన్నీ వదిలి నీకై నేల రాలిన
ఆ పావురపు అంతిమ కేకను
ఈనాటికైనా
వినగాలిగావా నువ్వు?
sreekaanth.... really moooving man....
ReplyDelete