నయన గీతం

సముద్రం ఒడ్డున, ఒక రోజు నాకు దొరికిన
రెండు చిన్ని గవ్వలు:
నీ కళ్ళు

అదే రోజు నేను చూసిన, అప్పుడే పుట్టిన
కళ్ళు తెరవని తేనె పిట్టలు: 
నీ కళ్ళు

అప్పుడే పూసిన పూవులూ, చెట్ల బెరడులపై
బిరబిరా తిరుగాడే ఉడతలూ:
నీ కళ్ళు

మబ్బులు పట్టిన కాలంలో, లేత ఆకుపచ్చ
కాంతిలో మెరిసిపోయే తోటలు:
నీ కళ్ళు

చెబితే నమ్మవు కానీ, నువ్వు కనురెప్పలు
తెరచినప్పుడు వీచిన
వాన వాసన ఇక్కడ

ఇప్పటికీ ఒక పొగమంచుతో - ఇక 

ఈ రోజును దాటేందుకు,నాకు దొరికిన
ఒక త్రొవ్వ వలె, ఒక
చూపుడు వేలు వలే-

చెప్పు,ఇక ఎవరికి భయం-మృత్యువంటే?