తెరలు

ఈ వీధి దీపాల కాంతిలో, అలలో
చెట్లో తెలియని నీడలు,
బాల్కనీలో ఎదుర్చూస్తో నువ్వు,

"ఎవరి కోసం?" అని, అడగాలని
ఉంది. జవాబులు మరి
అంత సులువుగా రావని తెలిసీ!

నింగిలో, జ్వలిస్తో జాబిలి. మరి
ఎందుకో దానిని, ఒక
పసుపు గులాబీలా ఊహిస్తాను

గాలికి ఊగిసలాడే దీపశిఖలాగా
చీకట్లో, ఊచలపై అలా
చేతులు ఉంచి, చూసే నీలాగా!
***
వీధి దీపాల కాంతిలో ఈ మంచు,
బహుశా నీ భాష; మాటా ...
ఎవరో నడిచి వెళ్ళిపోయినట్టు

ఆరినా, స్మృతిలో వెలిగినట్టు!