కుమ్మరి

ఎంతో ఓరిమితో రెండు చేతులు
చీకటిని త్రవ్వి, రాత్రిని
ఓ మట్టికుండగా మారుస్తోన్నట్టు,

"అమ్మాయీ, తెలుసా నీకు? నీవు
ఓ కుమ్మరివని?" అని
నేను ఎన్నడైనా చెప్పానా నీకు?

రూపరాహిత్యం నుంచి రూపానికీ,
నింపడానికి ముందు
ఒక ఖాళీని సృష్టించి, సృజించి,

ఎంతో ఓరిమితో రెండు చేతులు
ఒక దీపకాంతిని చుట్టి,
గాలికి ఆరిపోనివ్వకుండా ఆపితే
***
ఎంతో అర్థంతో, రెండు చేతులు
రాత్రిలో ప్రాణవాయువై
తెగిన గొంతుకలో గుక్కెడు నీళ్ళై!