మంచుపూలు

కావలించుకున్నావు నువ్వు; నీలో
ఒక అలసట వాసన,
అశ్రువుల దండ తెగి, నేలపై

చెల్లాచెదురయ్యే చప్పుడు;

పూలతోటలు గాలికి శివమెత్తినట్టు
శరీరం ఒక సుడిగాలై
ఎటో ఈడ్చుకుపోతునట్టు, మరి

ఎవరో బిగ్గరగా ఏడ్చినట్టూ,

బహుశా, పెద్దపెట్టున చెట్టు ఏదో
కూలినట్టూ, పక్షులన్నీ
కకావికలై ఎగిరిపోయినట్టూ, ఇక

నువ్వూ, నీ రొమ్ములూ, రెండు

భీతిల్లిన రాత్రుళ్ళు; పొగమంచు
వ్యాపించే సరస్సులు;
వొణికే నీడల లోకాలు; కాలాలు!
***
కావలించుకున్నావు నువ్వు; ఎంతో
దుఃఖంతో, ప్రేమతో;
ఇక ఆ రాత్రంతా, ఈ హృదయం

ఒక బాలికై, గుక్కపట్టి మూల్గుతో!