అనువాదం

నిద్రపోయి ఉన్నావు నువ్వు -

పూల తీగలేవో చిన్నగా ఊగినట్టు, నీ ముఖంపై
పల్చటి నీడలు: శ్వాస వలే గాలి. సందిగ్ధంగా
ఊగిసలాడే రాత్రి కాంతి (నిన్ను లేపలేని
నా హృదయం వలే) -

ఇక నిన్ను లేపలేక, ఆ నీడల్లోనే, వాటి లోతుల్లోనే
లిపిలేని వాటి శబ్ధాలలోనే చిక్కుకుపోయాను
నేను. అక్కడే (అనువాదం లేని పదాన్నై)
మిగిలిపోయాను నేను -
***
మృత్యువు అంటే ఏమిటి? అనేనా నువ్వు ఆ రోజు
నన్ను అడిగినది? నిద్రించే నీ కనులకింద
కదిలే పూరేకుల శబ్ధాల్ని వినడమనీ
శ్వాసించడమనీ చెప్పానా

నేను నీకు ఇంతకు మునుపు ఎన్నడైనా?