చీకటి

అలవాటయిన చీకటి -
దాదాపుగా, తాకినంత దగ్గరలోనే నువ్వు:
ఈ వర్షపు గాలీ -
ఎక్కడి నుంచో మరి
గులక రాళ్ళపై నుంచి దొర్లిపోయే సన్నని
నీళ్ళ సవ్వడి -
(మరి, అది నీలోనా
నీ కళ్ళల్లోనా, నాలోనా అని అడగను నేను
కానీ) తేలిపోయే
ఆకులూ, నెమ్మదిగా పిగిలే
గూళ్ళూ, నదిలోకి జారిపోయే ఇసుకా ఇక
మన మాటల్లో -
***
అలవాటయిన చీకటి -
దాదాపుగా, తాకేంత దగ్గరలోనే, ఉండీ
తాకలేక ఇక
ఆ చీకట్లోనే నువ్వూ
ఆ చీకట్లోనే నేనూ, ఆ స్వీయచీకట్లోనే
బహుశా అందరూ!