మరి వస్తావా నువ్వు

1
నువ్వు లేవక ముందే లేచి ఉంటాయి ఆ బచ్చలి ఆకులు-

ఆకాశం వొంగి, వాటిని తన వొడిలోకి తీసుకుని, మంచుతో కడిగి శుభ్రపరచినట్టు
ఆ ఆకులు, నవ్వుతూ పలుకరించే ముఖాల లాగా
ఒక పసితనపు లాలిత్యంతో, పచ్చదనంతో నీ పెరట్లో-

అప్పుడు నువ్వొక దానిమ్మ చెట్టువి. నీ పెరట్లో వాలి
ఒకదానిపై మరొకటి కలబడుతూ ఆడుకునే ఆ పిచ్చు
కలలో, నువ్వు ఒకడివి. నీకై ఎదురు చూసే పిల్లలను

తాకి, వాళ్ళ జుత్తును చెదిపి, వాళ్ళ పెదాలపై చేరే గాలివీనూ- విను జాగ్రత్తగా
2
ఎవరో ఒక వెదురు వేణువుని నెమ్మదిగా బయటకి తీసి
ఊపిరినంతా ఒక దరికి చేర్చి, తన శరీరాన్నంతా, తన
ఆత్మ ఘోషనంతా ఒక నిశ్శబ్ధంగా మార్చి ఆ సప్త రంధ్రాలలోంచి వెలుపలికి ఊదే

కాంతి కదలికల తరంగాలని. ఎవరిదో ఒక పాదపద్మం
అతి సున్నితంగా, నీ ప్రాంగణంలోకి అడుగుపెడుతున్న
సవ్వడిని.  పూల రేకులపై వాలి, వాటి అంచుల వద్దకు

అతి సునిశితంగా జారే చినుకులని. ఎవరో ఒక రహస్యం
చెబుతున్నట్టూ మరెవరో నిన్ను అదృస్యంగా హత్తుకుని
గుండెల్లో దాచుకున్నట్టూ, ఆ బచ్చలి ఆకుల నీడల లోకాలలోకి వెళ్ళిపోయినట్టూ-
3
నువ్వు ఇది చదివే సమయానికి
నేను ఉండకపోవచ్చు. ఇక గాలికి
అల్లల్లాడిపోతూ ఎగిసిపోతూ తేలిపోతూ, రంగు మారుతూ ఆ బచ్చలి ఆకులే అక్కడ
4
మట్టిపాదులో వేళ్ళతో విశ్రమించి
మరి నువ్వూ నేనూ ఇక్కడ. ఇక
5
అంతిమంగా
పిట్టలు ఎందుకు పాడతాయో తెలిసి
ఒక శాంతిని కనుగొన్నట్టు అనిపించి

నా ఛాయలో నీవూ నీ ఛాయలో నేనూ. దా మరి నువ్వు కూడా, ఈ బచ్చలి ఆకుల
పందిరి కిందకు, చనిపోయేముందు
6
మనల్ని మనం
ఒక్కసారి, గాట్టిగా కావలించుకునేందుకూ
తనువు చిట్లేలా ముద్దు పెట్టుకునేందుకూ
7
మరి
వస్తావా నువ్వు, సీతాకోక చిలుకలు ఆగిన
ఈ రెక్కల బచ్చలి పందిరి కిందకి ఓ మారు?