గ్రహింపు

"దా, నాన్నా" అంది బెంగతో పాపాయి చిన్నగా
ఆతనిని తనవైపు లాగుతూ -
***
చూడలేదు అతను అటు
కిటికీలోంచి బయటకు చూస్తూ: ఈదురు గాలీ
మబ్బులూ, వానా -

అరల నిండా చెట్లు, తడచి -
పుస్తకాలలో ఆకులు: నలిగి, మగ్గీ, చితికీ. ప్రజలు
తేమై, రాత్రై, వెలిస్తే
***
"దా, నాన్నా", అంది పాపాయి, నీటి రంగుల్ని
కళ్ళల్లో ఒంపుకుని, తనని
చూడమని-
***
మ్రాగన్ను నిద్రలోంచి అతను దిగ్గున లేచి చూస్తే
ఒక ప్రతిధ్వని: హృదయంలో
కంపిస్తూ, ఖాళీగా ఓ ఊయల!