grace

నువ్వు వచ్చి వెళ్లిపోయావని 
తెలిసిపోతూనే ఉంటుంది: నేను భద్రతతో మూసిన కిటికీలు 
తెరచి ఉండటంలో - 

అప్పుడిక గదుల్లో 
నేలపై తార్లాటలాడే గాలిలో చెట్లు తడచిన నీ కురుల వాసన: 
పెరట్లో ఆరేసిన తువ్వాలుపై నీ దేహ దీపకాంతీ 
పొగ: ఇంకా సుదూర శబ్ధాలేవో -

ఆ కాంతిలో, ఆ పొగలో 
నువ్వు వొంపిన నీళ్ళతో తిరిగి బ్రతికిన మొక్కలూ, పూలూ 
పిట్టలూ, కీటకాలూ, చివరిగా, మన నాలుగు 
గోడలూ, నీడలూ, నేనూ -

నువ్వు వచ్చి వెళ్లిపోయావని 
తెలిసిపోతూనే ఉంటుంది: నువ్వసలు నాకేమీ చెప్పకపోయినా - 
సరిగ్గా ఎలా అంటే 

వాన వెలిసిన దారిలో  
పురాస్మృతుల్లో నడుస్తూ ఒక మనిషి, చీకట్లో చెట్లు వణికి
రాల్చిన జల్లుకి జలదరించి, సుషుప్తిలోంచి 
ఇప్పటిలోకి మేలుకున్నట్టు -