అర్హత

ఇక గది అంతా 
అప్పుడే ఊడ్చిన శుభ్రతతో, ఉదయపు కాంతితో దయతో 

సర్దిన వాటన్నిటిలోనూ 
ఆకుపచ్చనిదనం. అలలుగా ఆకులు కదిలే సన్నటి అలికిడి. గాలి. నేలపై 
నీరు నవ్విన మెరుపు. సుగంధం. ఇష్టం ~ 

ఇక ఇల్లేమో 
ఒక గూడుగా మారి, మెడల కింద ముక్కులతో పొడుచుకుంటూ పిట్టలు
ఆ గూటిలోంచి గూడు గురించి నీకేదో విడమర్చి 
చెప్పేందుకు ప్రయత్నిస్తున్నట్టు ~ 

సరే. గది అంతా 
అప్పుడే ఊడ్చిన ఆనందంతో, జీవన ఉత్సాహంతో, క్షమతో 

ఇక మంచం దిగుతూ అతను 
ఇలా తలపోస్తాడు: "నన్ను శుభ్రపరచే రెండు చేతుల అర్హతను మరి నేను 
ఎన్నటికని సంపాదించుకోగలను?"