పంజరం

ఎగిరిపోదామనే అనుకున్నాను, స్వేఛ్చగా  
దూరంగా - 

మరి తెలీలేదు నాకు ఇన్నాళ్ళూ 
నా రెక్కలు 
నీ హృదయానికి కట్టివేయబడి ఉన్నాయనీ 
నన్నే పొదుపుకుని
అవే శ్వాసగా, నువ్వు జీవిస్తున్నావనీ -

తెలుస్తూ ఉంది మరి నాకు  
ఇప్పుడిప్పుడే 
నేను ఇంకా నీకు కట్టుబడి ఉన్నాననీ
అప్పుడే నిన్ను విడిచి 
నేను వెళ్ళలేననీ

ఈ గూడు ఏదో 
నీ నుంచి నాకూ నా నుంచి నీకూ
అనుసంధానమౌతూ   
అల్లబడుతుందనీ
అలా మాత్రమే అది నిలబడగలదనీ 
లోకాన్ని పొదగగలదనీ 
సాకగలదనీ -

ఎగిరిపోదామనే అనుకున్నాను
తెలియక ఇన్నాళ్ళూ 
స్వేచ్ఛ అంటే 
నా వద్దకు నేను తిరిగి రావడమనీ 
నన్ను నేను
పూర్తిగా నీలో కోల్పోవడమేననీ-

ధన్యవాదాలు.