హక్కు

ఒక చినుకంత నిద్ర
అది మాత్రమే నువ్వు అడిగినది, నీ ముఖాన్ని అలసటగా
నా ఛాతిలో కూరుకుంటూ -

రాత్రి:
ఆకులపై మెరిసే చీకటి.
ఉండుండీ వీచి నిన్నూ నన్నూ దిగ్బంధనం చేసే చల్లటి గాలి:
చెమ్మ. మట్టిపై పల్చటి కాంతి -

గుబురు కుండీల మధ్య
ఒక సన్నటి అలజడి: మన మాటల్లా, మన నిస్సహాయాతల్లా
మన కోరికల్లా. మన మూర్ఖత్వాల్లా -

ఒక చినుకంత నిద్ర
మరి అది మాత్రమేనా నువ్వు అడిగినది, నిన్ను నువ్వు నాలో 
కూరుకుంటూ?