గడచిన దూరం

గడచిన ఎంతో నిశ్శబ్ధం తరువాత
గడప వద్ద నుంచి
లోపలికి నువ్వు

నడచిన ఎంతో దూరం తరువాత
నీ గుమ్మం వద్ద
నిస్త్రాణగా నేను

లోపలెక్కడో గిన్నెలోకి పడే నీళ్ళు:
పిచ్చుక పిల్లల
అరుపుల్లా -

బియ్యం కడుగుతూ, సాంధ్యచ్చాయలో
అలలవలే గోడలపై
నీ చేతి గాజుల
నీడలు

సన్నటి శబ్ధాలతో, మాటలేవో చెబుతూ
పిల్లలకి అన్నం
పెడుతున్నట్టు -

గడచిన ఎంతో దూరం తరువాత

కొంత శాంతి. రాలిపోయే
పూలల్లో వర్షపు
కాంతీ: గాలీ -

ఇక ఎవరంటారు, ఈ పూట నేను
తీరం తెలియని ఒక
ఒంటరినని?