బహుశా

చీకటి సద్దమణిగింది
గదిలోని దీపపు కాంతీ మందగించింది 
బయట 

వర్షపు రాత్రిలో 
ఇక రాలలేక ఒక చినుకు ఉగ్గపట్టుకుని 
ఒక ఆకు అంచునే 
ఆగిపోయింది ~

ఇది నిజం.
లోపల అంతా చల్లగా ఉంది. గూడు అంతా 
పక్షులకై మోకరిల్లింది. వాలి
తేలిక ఆవుదామని 
అనుకున్న 

ఒక భుజం
ఎక్కడో విస్మృతిలోకి కనుమరుగు అయ్యింది
అరచేతులలోంచి ఒక పూవు 
రాలిపోయింది.
'నువ్వు' అనే 

ఖాళీతనం మిగిలిపోయింది. మరి 
దీనినేనా నువ్వు 

'జీవించడం' అని అన్నది?