నీ ముఖం

అలసిపోయిన నీ అరచేతుల మధ్య ఇమిడిపోయిన నీ ముఖం 

ఈ రాత్రికి నేను చూడలేని ఒక చందమామ.

అలసిపోయి, పగుళ్ళిచ్చిన ఆ గోడల వెనుక ఏమి జరుగుతుందో
అలసిపోయిన ఆ మేఘాల వెనుక
ఇన్ని సంవత్సరాలుగా నీ ముఖం 

ఏ ఏ యుద్ధాలని వీక్షించిందో - ఒక్క నీకు మాత్రమే తెలుసు: ఇక
ఎడబాటు ద్వారా మనల్నికలిపే దూరంలో
ఈ పదాలు, నీ నిశ్శబ్ధాన్ని తెలిపేందుకు 

ఎవరో వదిలివేసిన చిహ్నాలు.

రా . పిడచ కట్టుకుపోయిన నీ అరచేతుల్ని
నా అరచేతుల్లో కాసేపు వొదిలివేసి

మనతో ఈ వర్షాన్ని మాట్లాడనివ్వు కాసేపు.