క్షణం

ఎలా
గడచిపోయిందో కాలం: అంత త్వరగా -

శీతాకాలపు రాత్రి.
చలించే నీడలు. తెరలు తెరలుగా కోసే గాలి. రాలే పసుపు
పూలు -

నీ అరచేతిలోంచి
నీ పిల్లవాడి వేలు చేజారి పోయినట్టు లోపంతా ఖాళీ. బెంగ.
నొప్పి -

ఏం చేయాలో
తెలియని బెదురు. భయం. అలసట. లతలు తెగిన దిగులు.
కంపన -

ఎలా
గడచిపోయిందో కాలం అంత త్వరగా
మరి తెలియదు

ఎప్పటికీ మనకు -
ఇక అంతిమంగా వెనుదిరిగి చూసుకుంటే, ఎక్కడో
మనం

ఎప్పటికీ చేరలేని దూరాలలో

శోకతప్త హృదయంతో ఇంటికి దారి వెతుక్కుంటూ ఈ లోకపు
సంతలో

నీ నుంచి తప్పిపోయిన
ఒక పిల్లవాడు!