ఎవరు?

తల వంచుకు కూర్చున్నావు నువ్వు;
తడిచి ముద్దయిన ఒక
పిచ్చుకలాగా, గాలిలో నిశ్శబ్దం,

"ఏమైంది?" అని, అడగాలని ఉండీ
అడగలేక, తడిచిన
ఆ రెక్కల బరువు కింద ఒక్కడినే,

మోపలేకా, ఎత్తాలేకా, నీడలో లేక ఒక
రాత్రో వ్యాపించినట్టున్న
కురుల కింది ముఖాన్ని చూడలేక,

"చెప్పవా?..." అని, అడగాలని ఉండీ
అడగలేక, కురిసిన
నీ కనుల చీకట్ల కింద ఒక్కడినే/నై,
***
తల వంచుకు కూర్చున్నావు; నువ్వు,
పొగమంచులాగా; మరి
ఎప్పుడో తప్పక అడుగుతాన్నేను

నిన్ను ఓ రోజు; "రెక్కలారిన పిచ్చుక
మాటలొచ్చి ఎగిరిపోతే,
రెక్కలు తెగి ఇక, రాత్రిలోకి అట్లా

నెత్తురుతో రాలిపోయేది ఎవరు?"