ఇట్లా

కాంతివంతమైన ఉదయం:
రాత్రి కురిసిన మంచుకీ, గాలికీ చిన్నగా ఊగే ఒక
తెల్లని గులాబి -
***
చల్లని దారులు. లేత ఆకులు:
వానజల్లులో రెక్కలు విదుల్చుకుని ఎగిరిపోయే
పక్షులు -

లోపల మట్టి, చిన్నగా నాని:
హృదయం ఒక విత్తనమై చిట్లి మొలకెత్తినట్టు ఒక
సువాసన -

అవును.
నువ్వన్నది నిజమే. అనుకోని వానజల్లు
ఇది -
***
తిరిగి రా నువ్వు. చూడు, ఎంత
అందంగా ఉందో ఇక్కడ. కిటికీ అద్దం వెనుక
ఒద్దికగా

నీ స్మృతి సమీరానికి
చిన్నగా ఊగే ఒక ఎర్రని గులాబీ పువ్వు, ఐదు
ఆకులు -