దీపం

వెలిగించిన దీపం చుట్టూ గుండ్రటి కాంతి సరస్సు

నువ్వు లేవు కనుక
సరస్సులో నా ముఖాన్ని చూసుకుంటాను
ఎవరో వొదిలి వెళ్ళిన నీడలను జాగ్రత్తగా తాకుతాను. ఎందుకో నవ్వుకుంటాను

గుమ్మానికి అవతలగా చెమ్మగిల్లిన రాత్రి.
రాత్రికి అవతలగా నేను రాసుకునే, నీకు ఎన్నటికీ చేరలేని లేఖలు.
అలల్ని చెరిపే ఈ గాలి, నా ఎదురు చూపులను తాకలేదు. నా శ్వాసను వినలేదు-
అందుకే - ఇక, నువ్వు లేవు కనుక

వెలిగించిన దీపం చుట్టూ ఉన్న
వలయపు ద్వారాలలోంచి, నీకు ఎన్నడూ తెలియని లోకాలలోకి
నెమ్మదిగా వెళ్ళిపోతాను నేను !