ప్రేమ

రాత్రంతా మేలుకుని నువ్వు నీతో మాట్లాడుకుంటావు. నిన్ను ఎవరూ వినరు
నీకు ఎవరూ బదులివ్వరు ~

కిటికీలకు ఆవలగా చీకట్లలో మెరిసే నక్షత్రాల మసక కాంతిలో ఎవరిదో పాదాల సవ్వడి
నిన్ను సన్నటి గాలిలా తాకి వెళ్ళిపోతుంది. ఇక అప్పుడు
పొదలలో మెదిలే పిల్లీ, నిండుగా కదిలే మొక్కలూ, ఎవరో
వదిలివేసిన ఒక గాజు కన్నూ నిన్ను నిర్లిప్తంగా చూస్తాయి.

అందుకని నువ్వు
రాత్రంతా మేలుకుని చూపుడు వేలితో గాలిలో లేఖలు రాస్తావు
నీకై నువ్వు - నీలో - ఒక సమాధిని తయారు చేసుకుంటావు.
ఆపై తొలి వెలుతురులో

నీ తోటలోని గాజు కన్నుని తుడుచుకుని, నీ కంటిలో అమర్చుకుని
నీలో నువ్వు మరణిస్తావు.