ఈ కాలం

ముసలి వాళ్ళం అవుతున్నాం మనం - చూడు

ఎదురింటి మేడ మీద ఎప్పటిలా
ముక్కుతో రెక్కల కింద పొడుచుకుంటూ
నీ వైపు చివ్వున చూసే పావురం
ఈవేళ రాలేదు: ఉదయం కురిసే

పొగమంచుకీ, సాయం సంధ్యకీ, మన గదులలో
రాత్రుళ్ళలో కంపించే నీడలకీ
నా పెదాల్ని నిర్లిప్తంగా తాకే నీ

పెదాలకీ, ఈవేళ పెద్ద తేడా ఏమీ లేదు: ఏం లేదు-
కొంత నొప్పి కొంత బెంగ. కొంత...
ఒకరినొకరు తాకబోతూ, ఆఖరి
క్షణంలో ఆగిన నీ అరచేతికీ నా

అరచేతికీ మధ్య మిగిలిన దూరంలో
వలయాలుగా రాలిపోతూ ఆకులూ
గూటికి తిరిగి రాని పక్షుల ఈకలూ
కుంచించుకుపోతున్న కాంతీనూ-

ఇక ఎలా గడవటం ఈ కాలం, నీ నుంచి
నాకూ, నా నుంచి నీకూ
ఆకులు రాలే ఈ వేళల్లో?