సూత్రం

పెద్దగా ఏమీ ఉండదు: నువ్వు గుర్తుకు వచ్చినప్పుడు -
ఎక్కడో ఏదో విరిగిపడి, లోపల లోతు తెలియని కందకం ఒకటి ఏర్పడి
ఇక, ఒక తపన - లోపల:

తల దాచుకునేందుకు, ఒక గూటి కోసమో
ఒక అరచేయి కోసమో, గూడు వంటి, ప్రమిదె వంటి ఒక శరీరం కోసమో, చివరికి
ఒకే ఒక్క  పలుకరింపు కోసమో

రాత్రుళ్ళలో, ఈ దిగులు కందకాలలో, గోడలపై
వ్యాపించే నీడల్లో, వీచే గాలుల్లో, నేల రాలి దొర్లిపోయే పూలల్లో, ఆకుల్లో
మోకాళ్ళ చుట్టూ చేతులు చుట్టుకుని

లోపలికి ఒదిగొదిగిపోయి కంపించే క్షణాలల్లో
ఒక తండ్లాట
ఒక యాతన
ఒక శిక్ష -

నిజం. నన్ను నమ్ము

పెద్దగా ఏమీ ఉండదు: నువ్వు గుర్తుకు వచ్చినప్పుడు -
పాలు తాగే, నెలలు నిండని శిశువుని చివ్వున లాక్కుని వెళ్లిపోతారు ఎవరో.
ఇక కళ్ళల్లో నీళ్ళతో, గుబులుగా

ఆ తల్లి ఒక్కతే అక్కడ, ముసురు పట్టిన
చెట్ల కింద చీకట్లలో ఒంటరిగా, గుక్కపట్టి ఏడ్చే తన పిల్లవాని జ్ఞాపకంతో -
నాతో!