ఛారికలు

ఎండ వెలిగిన గోడపై, నీడల ఛారికలు,

తెల్లని కాగితంపై
పిల్లలు పెన్సిళ్ళతో గీతలు గీసినట్లు -

అవును; ఇది చలికాలమే. రాత్రి అంతా
మంచు తెరలు వీచి,
ఉదయాన సరస్సులు నిశ్చలమయ్యే

లోకమే. కానీ అడగకు! గడ్డ కట్టినది ఏదో
లోపల అసలు ఏదైనా
చలనంతో జీవించి ఉన్నదో లేదో,

మంచుపేటికలో విగతమైన ముఖంలోని
తాజాదనం, మరి
బ్రతుకు చిహ్నమో కాదో, నువ్వు లేని

లోకాల శ్వేతస్మృతుల మృతప్రాయమో!
***
ఎండ వెలిగిన గోడపై, నీడల ముద్రికలు -
ఎవరివో కనులు వెలిగి
ఆరిపోయినట్లూ, అశ్రువులు ఎండినట్లూ!