|| ఇలాగే ||

పగలంతా ఇలాగే గడిచిపోయింది,

గాలికై ఉగ్గబట్టుకుని
అల్లాడక వేచి చూసే ఆకులాగే,

మంచం మీద అమ్మ ఒక్కత్తే, ఇక 

ఏదో యోచిస్తో; మరి
కేటరాక్ట్ ఆపరేషన్ అయి, ఏమీ

చూడలేక, కళ్ళప్పుడే తెరువలేక;
ఏముంది? తన కళ్ళ
కింద? వానకు తడిచే ఓ తోటా,

లేక, నింగికెగిసే పక్షులా? చెట్లకు
వేళ్ళాడే గూళ్ళా లేక
గోధూళి, మబ్బులై వ్యాపించిన

సాయంత్రాలా? చుక్కలు దీపాలై
వెలిగే రాత్రుళ్ళా లేక,
వెన్నెల ఓ నీటిపొరైన కాలాలా?

ఏముంది ఆ కళ్ళ కింద? అసలు
ఇవేమీ కాక, తల్లి లేని
పసిపాపలు ఉన్నాయా అక్కడ?
***
పగలంతా ఇలాగే గడిచిపోయింది,
గాలికై ఉగ్గబట్టుకుని,
శిలలైన పూలతో, బాల్కనీలోనే

బంధీ అయిన ఓ పూలకుండీతో!