క్రితం రాత్రి

బాదుతోంది తలుపుల్ని గాలి
దబదబామని -
***
తడచిన రాత్రి: ఊగే ఎర్రని దానిమ్మ పూలు -
మెత్తని చీకటి కాంతి -
బుగ్గలు సొట్టపడేలా ఎవరో నవ్వుతున్నట్టు
ఎవరివో మాటలు మరి

దూరం నుంచి: గాలిలోంచీ, వానలోంచీ -

(ఎవరు వాళ్ళు? అట్లా మాటలతో నవ్వైన
వాళ్ళు?)
***
బాదుతోంది తలుపుల్ని గాలి
దబదబామని

నీలోంచి నిన్ను, బయటకు రమ్మని -
***
నా మాట సరే: వినకు -

లేతెరుపు గోళ్ళతో నిను ఛాతిపై రక్కిన
ఓ తెల్లని పావురపు మాటనైనా
ఒకసారి వినవా నువ్వు?